騎師潘頓固然旺，落飛黨今日亦幾醒神，臨尾都要執多條綠燈連贏至收工，所指的是尾場第十場二班1600米由頭二馬「美麗傳承」及「加州騰龍」構成的18倍落飛Q。而「美麗傳承」單Win及組合獨贏A1分別派31.5及23.5元。
今場大摩馬房大熱門「美麗傳承」留前鬥後，拉士百幾米於潘頓左手狂鞭之下，在大外欄越衝越行，130磅亦及時超越蘇兆輝輕磅賽駒「加州騰龍」(117磅)，讓13磅仍K.O.對手，贏頭位報捷。「美麗傳承」乃澳洲2000米一級賽玫瑰崗堅尼亞軍，是莎莎老闆郭少明今年香港打吡武器，呢匹名氣馬在港兩戰一冠一亞，下仗應跑經典一哩賽。
潘頓全日合計憑「軍勇戰略」、「醉必勝」及「美麗傳承」大演帽子戲法，同雷神睇齊，並因上名次數多過雷神而再蟬聯騎師王。新一年跑過三次馬，騎師王都由潘頓勝出，而佢單係2017年頭兩周未過已經贏咗十場賽事，剛好係雷神的一倍，認真犀利！
「美麗」系馬主季內旺過旺角，累積七次贏馬清一色由潘頓經手，雙方可謂天作之合，至於大摩今日出七駒，錄得兩冠一亞一季一殿，剛好多蔡約翰一場第四，亦成為全日成績最佳練馬師，。
尾場二至四名順序為「加州騰龍」、「西方快車」及「勝得威」，四重彩派近五千四百元。