本港地產商負責賣樓嘅高層，多數表現保守，好似新地（016）樓神雷霆、恒地（012）林達民，推銷樓盤通常着得靚靚仔仔影張相就算，好少好似中國海外地產董事總經理游偉光咁出位。
佢推銷「港人港地」項目啟德1號，舊年坦言「印象中特首冇提及要以合理價錢，讓香港人買到港人港地單位」。上星期樓盤高價開售，佢又開火鬧傳媒，連番反問「咁幾多價（錢）先唔進取呀？」呢位游生真係好易令人記得佢。
翻查資料，游偉光1986年理工畢業，1990年加入中海地產，由營業部物業主任一路做，一路升職，至今有27年，肯定係中海地產老臣子，難怪面對傳媒說話時，隱隱有一道霸氣。由於佢並非上市公司中海外（688）嘅董事，所以無法從年報得知佢年薪幾多（最想知呢個數囉）。