香港人最鍾意遊日，早前北海道大風雪，令到包括李嘉欣在內嘅一班港人滯留當地；近日土耳其伊斯坦堡刮起暴風雪，竟然都影響到財經中人。中大商學院助理院長李兆波（Simon）帶住一班學生去捷克交流，原本經土耳其轉機回港，土耳其大雪停晒航班，佢哋被迫滯留捷克，今日返唔到學喇。
Simon早前帶團，同中大商學院19位高材生去捷克布拉格交流一個星期，仲申請咗民政事務局嘅一帶一路交流計劃資助，原本「輕輕鬆鬆鄧梓峰」，應該噚日下午5點半抵港。點知土耳其伊斯坦堡出現暴風雪，土耳其航空取消咗往香港航班，佢哋要轉搭奧地利航空，要經維也納返港。
Simon話，布拉格機場噚日都打晒蛇餅，但香港人唔多，佢哋亦唔使瞓機場，安排咗酒店畀學生。最主要係中大下學期今日開課，Simon嘅堂被迫取消，學生亦返唔到學。好在Simon買咗大額旅遊保險，應該有得賠。