【本報訊】雖然今年投資「無美不歡」，但資金流向一旦改變，港股悶局可望打破，滙豐金融服務（亞洲）投資策略主管劉紹文今年點評4大「鹹魚翻生」板塊，包括內房、內險、航空及航運、本港金融股，投資者可趁低吸納博反彈。
「所謂鹹魚股，一聽大家都會話冇興趣、好悶、嘥我時間，但估都估唔到」。劉紹文續說：「舊年零售板塊半翻生；當講緊仲邊有人賭時，濠賭股又反彈。最估唔到係金屬煤礦板塊，因為預期美國大興土木，帶起全球商品需求而翻身」。
展望今年的鹹魚翻生股，劉紹文首推被低估的內房、內險板塊。他認同，兩個板塊會受到內地政策左右，中央仍然關注樓價過高、走資等問題，令現時兩個板塊較淡靜，但他認為股價已經累積一定跌幅，相對資產價值有大折讓，更值得投資者留意。
「鹹魚股喺最平嘅時間，大家一定唔睇好，但同一時間係真係計到價值。好似幾隻藍籌內房股息率都係上市以來最高，現時股價相對資產凈值折讓超過50%，係歷史低位，股價已反映好多不利因素」。他亦看好本港傳統金融股，相信於加息周期下，將有利本港大銀行業務。
去年末內銀股亦見異動，當中北水顯著大手吸納建行（939）。劉紹文指，滬、深港通推出時間尚短，仍未能從數據中洞悉因由，但亦發現每逢季末，內地就有資金追入數隻大市值的銀行股，但數星期後資金就會離開，市場估與衍生工具相關。