這天沙田馬場第二場四班1400米，潘頓贏葉楚航馬房「軍勇戰略」，此駒因慣常騎師韋達停賽而益下家，結果輕而易舉地開齋，單Win及組合獨贏A2分別派52.5及19元。
今次已經係潘頓2017年第八場頭馬，佢由生日前旺到生日後，個人累積跨年連勝五個賽日共取11Win，風頭之勁可謂一時無兩。至於葉楚航亦憑「軍勇戰略」，與「軍」系馬主陣營一齊敲響新一年勝鼓。
賽前所知，潘頓係老早應承咗葉楚航騎「軍勇戰略」，以致其後「美麗」系幕後搵佢騎「愛美麗」，佢都焗住要向呢路主要支持者送上閉門羹，結果亦證明佢選擇正確，「軍勇戰略」沿途守第二位下，直路透出大勝2.25馬位。
呢場賽事係熱門天下，第三熱門「軍勇戰略」勝出，大熱門「飛越峰」後上跑第二，第四熱門「好叻仔」得第三，反為落飛次熱「愛美麗」姍姍來遲只跑第四，四重彩2,217元。
其中「飛越峰」騎練柏寶、蘇偉賢賽後似甚失望，蘇偉賢一副天然呆樣子，「飛越峰」則一連三仗兩亞一季，始終未開齋。