綽號「尖啤」嘅劉夢熊，洪亮聲線同大肚腩係佢嘅標誌，雖然身在獄中失去自由，卻依舊有高昂鬥志，佢向《蘋果》發送嘅家書中表明「我可以被毀滅，卻不會被打敗！」尖啤透露喺獄中勤做運動，減咗足足成34磅，但似乎減磅唔等於減咗佢嘅戰鬥力。
下月底刑滿
尖啤接受廉署調查期間，因為去信特首梁振英同廉政專員白韞六，被控意圖妨礙司法公正罪成，去年2月被判即時入獄，下月底將刑滿出獄。事隔一年，尖啤依然有火，佢自比50年代遭中共批鬥嘅胡風同彭德懷，同樣因信獲罪，嘗盡世態炎涼，「痛徹心脾體會到政治的黑暗、險惡、殘忍、無情」，佢話如此種種教佢「分清真朋友、假朋友；深切感受到親情可貴、友情崇高、愛情偉大」。
雖然人在旅途灑淚時，但佢強調冇向現實屈服，「沒有做鵪鶉，依然一身正氣」，難怪依然不時喺報章撰文評論政事。
佢仲話喺獄中抱住清者自清、俯仰無愧嘅心情，專注閱讀同鍛煉體魄，「成功減肥34磅，非常健康」，預告上訴案件將於3月初開審，「歷史將宣判我無罪！」
到底呢34磅係點樣搣走？懲教署表示，在囚人士每日有早、午、晚3餐，主餐用膳時間約一個鐘，一般以米飯為主糧，但可因健康、膳食同宗教需要申請轉換主糧為咖喱同薄餅、麵包同薯仔或全素餐，膳食份量就由營養師釐定。根據法例，每個在囚人士都要運動，如天氣情況許可，會安排每人每日不少於一小時嘅戶外運動。
李八方
mailto:[email protected]