正值長跑旺季，噚日「全城街馬」吸引萬人參加，香港金融界嘅跑隊JustRunners亦開始今年第一跑，當中招銀國際嘅蘇沛豐（Daniel）犧牲星期日湊女時間，用54分鐘完成10公里賽，之後就要趕返屋企接老婆更，照顧阿女。
Daniel本來諗住噚日可以跑出個人最佳時間，可惜感冒未清，加上天氣太熱「爆唔起」，佢話帶病上陣都有呢個成績，已經好滿意，仲大讚賽道易跑兼唔塞人。
街馬之後，緊接下個月Daniel就會跑渣馬10公里，佢話會盡量唧時間練跑，目標係超越上年52分嘅成績，明年可以嘗試挑戰半馬。
至於JustRunners其他成員成績都唔錯，復星資本嘅葉浩文（Kirk）只用了47分就跑完10公里，瑞信何壠聰（Ivan）雖然跑到一半時傷到背肌，要半行半跑完成賽事，但都可以一個鐘內完成，好有毅力。