長春社同香港觀鳥會喺噚日同嚟緊星期六舉辦第11屆塱原收成節，近千位市民化身假日農夫，喺塱原濕地一齊彎腰落田，採收慈姑同西洋菜，分享一年來嘅農耕成果，噚日都有唔少家庭一家大細到塱原做農夫。
兩會舊年11月起舉辦一系列活動，包括塱原小農夫、飛鳥模型設計比賽、田園音樂會等，重頭戲當然都係噚日同星期六嘅收成節連串活動啦，包括「馬蹄王」比賽，等市民參與水田耕種及濕地保育工作，親身感受農耕苦與樂，今年仲新增冬季奧運會，比賽項目包括拔河同閃避球，等參加者喺田中耍樂。
兩會係獲自然保育基金資助，2005年喺塱原展開自然保育管理計劃，協助回復昔日嘅水田耕種同提倡本地農業可持續發展，仲將絕迹多年嘅慈姑、馬蹄等水耕農作物再次引入塱原。