近年攀石運動越嚟越多人參與，仲成為咗2020年東京奧運嘅比賽項目㖭！啱啱個周末，喺大角嘴一個商場入面就進行咗KAILAS JUST CLIMB CUP 2017攀石比賽；其中前世界冠軍、嚟自南韓嘅星級靚女好手金佳音（Jain Kim），就喺女子專業組得到季軍。
賽事一連兩日分男、女專業、公開、大專同青年八個組別嘅賽事，吸引到近170個海外同本地攀石嘅高手參賽。最後，女子專業組由兩位新加坡選手包辦冠、亞軍，至於靚女金佳音得到季軍。金佳音贏過三屆世界盃難度賽冠軍，係南韓喺東京奧運嘅獎牌希望嚟㗎，佢話：「我嘅主項係難度賽，奧運要鬥三個項目，所以我要加強抱石同速度賽嘅訓練。」第一次嚟香港嘅佢仲話，好鍾意香港嘅嘢食：「我已經試過點心，真係好正！其實香港好多地方我都想去，但未必有時間，希望下次有機會去迪士尼樂園！」