女將蔣嘉琦剛周三（4日）夜馬兩度被查問跑法，並遭競賽小組告誡。所謂知恥近乎勇，今日第七場四班1400米，佢騎苗禮德馬房「好愉快」2檔起步，使出自己強項貼欄領放，末段反先雷神座騎「運財童子」爆出12倍冷Win，組合獨贏A2派31.5元。
雷神同蔡約翰跑完第六場已合作起孖，呢場兩人一心憑「運財童子」呢匹新勝馬攜手中三元。不過只得3歲的「運財童子」雖實力超級，但似乎太稚嫩，整條直路不停內閃。
「運財童子」沿途守第二位，末段雖一度追越放頭的「好愉快」明顯已突圍，但雷神一邊催策一邊修正內閃的「運財童子」，人馬鬥力消耗不少，同時嘉琦BB亦唔俾佢同蔡約翰過骨，騎住「好愉快」呢匹南非自購馬猛追，人馬都冇放棄。結果嘉琦BB力鞭之下，臨尾Fight Back過番「運財童子」反敗為勝一個頭位，「好愉快」就此打破今季頭馬荒，連帶鞍上人同練馬師苗禮德，都打開埋新一年勝門。
第七場開冷頭熱腳，二至四名順序為次熱門「運財童子」、大熱門「心慷慨」及半冷馬「靚加加」，四重彩派一萬四千幾。