經民聯近年愛擺盆菜宴，同支持者、街坊同義工擦餐勁，席間會向義工發嘉許狀。噚日傍晚佢哋亦喺土瓜灣遊樂場舉辦新春盆菜宴，筵開二百幾席。九西呢期好多爭議，經民聯喺呢個是非地開餐，相信絕對唔關故宮事，或者因為黨內唯一直選立法會議員梁美芬係九西女將，所以遷就吓呢位直選議員！
除咗領導層如監事會主席林建岳等到場主禮，政制及內地事務局局長譚志源同食物及衞生局局長高永文亦畀面撐場；其間民望高滿場飛，同市民自拍留影，喺開席時更雙眼發光流晒口水，原來佢對筷子夾住咗一嚿肥豬肉（圖），好似等唔切要落肚咁滯，估唔到民望高都咁為食㗎喎。