曼城前鋒阿古路停賽期滿復出之後，腳風好鬼順，不過就仍然好鬼頭痕，皆因佢嘅前妻簡妮亞可能要發律師信告佢嘅新歡卡蓮娜！
前妻護子嬲爆提告
為乜要搞到發律師信咁大件事？事緣阿古路嘅歌星新歡卡蓮娜個九歲囡囡素兒，喺個人社交網頁Instagram度嘲笑簡妮亞同阿古路所生嘅七歲囝囝賓哲文「乸型」。而身為阿根廷球王馬勒當拿個女嘅簡妮亞，性格一向火爆，知道囝囝俾人話之後，就立即搵律師，而阿古路嘅新歡舊愛仲爆發網上罵戰。新歡卡蓮娜話：「有乜想講就同我講，唔好無中生有，仲拉埋我個女落水！」舊愛簡妮亞就反擊：「小朋友係大人嘅一面鏡，佢哋嘅行為反映出佢哋嘅家教。」阿古路惟有兩邊做和事佬，雖然大部份留言之後都被刪除，不過，據報簡妮亞啖氣仲未消，阿古路可能有排煩。
