香港泳壇有唔少「美人魚」，噚日喺尖沙嘴舉行嘅香港游泳教練會年度頒獎禮，佢哋大部份有出席，當中歐鎧淳以一條白色長外套現身就最搶鏡；佢同去年八月里奧嘅一眾女子接力隊代表，獲頒特別貢獻獎。至於年度最佳男、女泳員，就由徐海東及正喺美國密芝根大學讀書嘅何詩蓓奪得。
噚日淳淳BB呢身打扮配上淡妝，低調得嚟仍然好搶鏡。上年佢同另外三位隊友施幸余、江忞懿、鄭莉梅，歷史性躋身里奧女子4x100四式接力賽，最後仲奪得第14名，有出席頒獎禮嘅淳淳同施幸余就齊齊上台講得獎感受。
徐海東、何詩蓓膺最佳
以200米背泳A標躋身里奧嘅劉彥恩，亦攞到最佳進步獎，佢話：「幾年前我曾經上過呢個頒獎台，今年可以再上台真係好開心，好多謝家人同教練一直支持我去追自己嘅夢，希望2017年繼續進步。」
陳健樂上年年底喺世界盃短池賽屢破蝶泳港績，所以亦攞到最佳進步獎，至於男子組最佳進步獎，就由張健達同吳鎮男瓜分，佢哋喺上年分別多次刷新200米自由泳同100米蝶泳嘅港績。最佳男、女泳員呢個獎，得主就係多次刷新100米蛙泳港績嘅徐海東，同埋上年首位達里奧A標兼歷史性晉身奧運200米自由泳準決賽嘅何詩蓓。