今次沙田日賽戲肉係國際三級賽洋紫荊短途錦標，只得六駒列陣，比元旦日重頭戲華商會盃仲少一隻，編於第三場舉行跑草地1000米直路賽。
呢場焦點係兩大功夫巨星甄子丹同洪金寶的對決，分屬兩人名下愛駒「宇宙車神」及「崇山寶」都唔能夠受惠於輕磅而跑入三甲，「崇山寶」有前冇後跑梗頸四，而丹爺的「宇宙車神」更被捧成2.0倍大熱開跑，起步同身旁馬匹挨碰就此拜拜，沿途墮後輸到尾二（第五名）而回，甄子丹、洪金寶兩人都有現身並於賽前握手，結果齊吃敗仗，雙雙敗興而返。佢哋運氣遠不及近日只花$2,600買馬仔，卻贏1,600萬彩金的曾志偉。
今仗頭馬是雷神莫雷拉操刀、蔡約翰馬房的「華恩庭」，沿途守第五位，後上輕鬆奪標贏1.5馬位，單Win派58元正。雷神繼元旦日以姚本輝馬房「有得威」勝出華商會盃後，再將洋紫瓶短途錦標據為己有，佢包辦晒今年首兩項分級賽頭馬。而「華恩庭」繼季初國慶盃後，再度稱霸沙田草地1000米直路賽錦標，兩者均是國際三級賽。
與「宇宙車神」同屬大摩旗下的「新力風」由潘頓後上跑第二，表現唔曳，但就宣告衛冕洋紫荊短途錦標失敗。第三名由最重磅133磅的「幸福指數」取得，第四名「崇山寶」，四重彩派2,350元。今場不設位置Q及第三名位置派彩。