學到一技之長，唔驚冇嘢撈！唔少年輕人近年參加政府、職訓局同業界推出嘅職學計劃，修讀一年全日制課程然後接受在職培訓；好似21歲嘅羅凱豐自細好鍾意車，文憑試後參加職學計劃，做汽車維修學徒。佢修畢職專文憑汽車科技基礎課程後，獲安排喺仁孚行接受在職培訓，𠵱家負責汽車保養，佢話維修壞咗嘅車，就似醫生醫病人咁有滿足感。
25歲嘅羅永燊就揀咗機電業及建造業職學計劃，𠵱家喺中華煤氣做學徒。佢話中學畢業時自知學歷不足又冇專業技能，佢以過來人身份話，如果唔啱讀書，不妨嘗試其他出路，「練得一技傍身更能保障生活」。受訓期間，學員會獲僱主保送修讀兼讀課程，每月獲發不少於8,000蚊薪金同平均2,000蚊政府津貼，完成三年培訓仲可額外獲30,800蚊職學金。