近一兩個星期有關中超球會豪購歐洲頂級聯賽球員嘅消息多到爆炸，啲天文數字轉會費同人工已經開始聽到麻木（見附表）。前德國國腳普多斯基，被傳會過嚟中國掘金已經有一段時間，一路都傳話會加盟北京國安，不過日前竟然有報道指普多怕咗京城嘅霧霾，打消去國安嘅念頭，轉投班霸廣州恒大嘅懷抱。
贏過世盃成生招牌
31歲嘅普多斯基，喺效力阿仙奴期間出名夠晒hea，波唔使點踢，成日喺社交網站留言post相過日晨；之後被借去國際米蘭，到2015年被賣去土超加拉塔沙雷，都係依然冇乜好表現。雖然係咁，普多早年仲有德國國家隊路維照住，喺國際大賽一直都預埋佢。衰衰地普多都係2014年世盃冠軍隊成員之一，有呢個光環，自然啱晒一班中超豪門球會嘅胃口，成為佢哋挖角目標之一。加拉塔沙雷方面亦都證實收到斟介，球會董事利文特話：「的確係有一間嚟自中國嘅球會對普多斯基有興趣，我哋亦同對方傾緊，普多好有可能會喺短期內有新發展，或者就係去中國搵食。」普多本人亦都證實有機會轉會：「係有球隊提出斟介，但我仲未決定好。」
恒大簽普多必先清人
過去一兩星期一直傳想斟普多嘅中超球會係北京國安，後者𠵱家陣中有土耳其前鋒布拉克爾馬斯，佢亦曾經效力過加拉塔沙雷，有助普多加盟之後適應。不過事情可能有變，北京市霧霾問題近日又變得好嚴重，有指呢個亦係普多猶豫不決嘅原因之一，傳佢可能會放棄國安，另一出路就係加盟上屆中超冠軍恒大，離開北京去遠少少嘅南方，對於普多嚟講可以話係更健康嘅選擇。
幾間中超豪門已經喺轉會市場勁燒銀紙，不過恒大暫時動作唔大，佢哋目前陣中已經有積臣馬天尼斯、荷西保連奴、列卡度高拉特同埋阿蘭；唔計亞援，四名外援名額已經爆滿，即係話要簽普多斯基嘅話，就要先清洗一名外援，有傳會係傷癒後上季表現一般嘅巴西前鋒阿蘭。