曼聯近期氣勢返晒嚟，上周六英足盃第三圈主場對英冠嘅雷丁，就算將伊巴謙莫域、保羅普巴等主力放喺後備都冇有怕，輕取4:0。復出即先開紀錄嘅朗尼喺2004年加盟紅魔後，累積入球終於到達249球，追平名宿卜比查爾頓嘅紀錄，並列球會神射手，以後唔好再笑佢又肥又慢，把刀生晒銹喇。
249球睇齊卜比查爾頓
雷丁領隊史譚，球員時代係紅魔王朝重要一員，但𠵱家帶領嘅球隊始終級數一般，曼聯半力出擊都夠殺；七分鐘安東尼馬迪爾傳中，桑馬達踢前，31歲嘅朗尼第一時間射入，紅魔閃電先開紀錄。朗尼今季踢咗14場聯賽先入得一粒，𠵱家踢英足盃七分鐘就入波，似乎盃賽利佢多啲喎。俾人笑「朗肥」都好，朗尼2004年加盟曼聯後，已經入咗249個波，同卜比查爾斯睇齊，真係威風。15分鐘，曼聯由馬迪爾拉開比數，加上拉舒福特五分鐘內梅開二度，輕鬆贏4:0，晉級第四圈。
連埋英超同歐霸盃，曼聯已經八連勝，不過英超仲排第六，要上番前四甚至爭標，都仲有一定難度，所以領隊摩連奴就希望喺一月擴軍，其中盛傳想用到22萬鎊（約209萬港元）周薪，利誘馬德里體育會嘅法國前鋒基沙文加盟。曼聯中場普巴對於同胞可能加盟就梗係有讚冇彈啦，佢話：「基沙文唔係前鋒出身，不過上季都有咁多入波，甚至成為世界足球先生最後三位候選人之一，真係好厲害，而且佢訓練嘅態度都好值得年輕球員學習。」