中女C本來做開廣告，有感於傳媒廣告愈來愈難做，好多大公司之市場推廣及廣告預算又逐漸將重心放在數碼，搞所謂digital marketing，公司自己做番，連廣告公司代理嗰份都慳埋，於是諗定後路轉型，但中途轉行，做乜嘢好？佢最近因家人有病入院，用咗一大筆，保險費賠到六成，保險經紀乘機遊說佢以後買多份醫療保險。中女C想咗一輪，打電話俾左丁山：「喂，我想轉做保險經紀，當開多一條後路，我橫掂行街推銷慣，應該捱得住嘅，你可唔可以介紹一位師公師母之類嘅人物，帶我入行？」
冇計啦，考到保險經紀牌之後，唔好嚟纏我就得嘞。即時搵到一位重量級師娘級人馬俾佢識，兩人同是夠進取嘅行動派人物，一見合眼緣，師娘肯收中女C做徒弟，叫佢上堂、考牌（每個月一次），點知中女C上堂每事問，樣樣why why why，導師瞪佢幾眼，答：「不要問，只要背。」呢，全個課室爆滿，不乏內地大嫂新港胞，導師講解之時，人人玩手機，粒聲唔出。上完堂去考試，全班有好多人及格，中女C竟然肥佬。呢日中女C特登酬謝師娘在米芝蓮三星餐廳唐閣請吃午飯，叫埋左丁山去，嘩，嘢係好食，小菜撚手到極，但價錢好貴噃，唔係可以經常幫襯嘅。中女C向師娘訴苦：「有乜辦法順利考到牌呀？」師娘教訓佢：「保險牌太多人考，只要背書就得，你唔好咁多獨立思考啦，保監會試卷係選擇題，你左度右度去推理，實錯㗎，我手下有不少大媽，佢地人人死背書，不思考，不理解，咁就全部及格攞到牌，政府規管，有乜邏輯，唔到你問，你總之背熟啲規條規管就掂。」依家做事，樣樣都要考牌，你估係考思考推理邏輯咩，要你熟規則，不惹來投訴之嘛！同師娘講起國家外匯管理局重申，每人年購外匯五萬美元，不准在境外用於買樓，買股票，買人壽保險，對保險公司生意咪有好大影響？師娘笑而不語。飯後再問一位保險界朋友，呢位朋友話：「用國內術語，有問題，問題不大。內地人每年限購五萬美元外匯，五萬美元做得乜吖，買樓交首期都唔夠，有辦法之人就每年何止有五萬美元轉出境呀，外匯管理局交吓功課嘅啫。」朋友所言亦是，內地政策多捉蒼蠅少捉財金大鱷，外管局之購匯限用途政策連打手板都嫌細力，只係顯示吓政治決心兼且防止螞蟻搬家啫！