源禾路體育館噚日人頭湧湧，因為嗰度舉行嘅沙田武術錦標賽今年創新高，有超過1,700人參賽，比大會預計嘅800人多逾一倍，就連舊年10月喺保加利亞世青奪金、10歲嘅賀曦彤（小圖）都報名參加，可惜人算不如天算，曦彤身體抱恙被迫缺席。
曦彤嘅缺席，連戰友顏嘉穎都話可惜，11歲嘅小六女生嘉穎雖然同曦彤讀唔同小學，但因武術由細打到大，齊齊入選港青。嘉穎噚日喺10至12歲女子長兵器組別嘅比賽，如願奪得冠軍，佢賽後大讚曦彤：「曦彤缺席真係有啲可惜，佢攞到世青冠軍後，同以前冇分別，同樣好熱心去教細過自己嘅師弟妹，佢喺比賽中過人之處係凌厲眼神、速度同力量，好值得我去學習。」曦彤就讀嘅培基小學，噚日派出約20人參賽，由陳少傑教練帶領，奪得高小組集體短兵器組嘅劍術冠軍及刀術季軍。