上周六NBA常規賽有唔少精采比賽，紐約人作客公鹿，兩大近年上位嘅新星普辛基斯（Kristaps Porzingis）同「字母哥」G安迪度安寶（Giannis Antetokounmpo）都有出色表現，結果都係紐約人夠韌力，收復一度落後18分失地，贏116:111結束六連敗。
普辛基斯因傷缺陣三場之後復出，入24分兼有六籃板三次封阻，四次射三分入三球，內外線都玩晒。佢呢場真係搏到盡，同隊友諾亞（Joakim Noah）都喺第四節滿六犯離場，喺關鍵時刻仲有安東尼（Carmelo Anthony），完場前唔夠一分鐘入三分球，助紐約人喺下半場首次領先，保住優勢贏波。公鹿字母哥喺啱啱公佈嘅明星賽首階段點票，排東岸前場第二，佢講笑話如果球迷識得串啱佢水蛇春咁長個名，票數過百萬都不是夢。今場佢表現都唔錯，入25分之餘仲有五次封阻，不過第四節突然手軟，七射一中。
另外，勇士喺主場爆冷輸畀灰熊。勇士一度領先成24分，但第四節突然崩潰被追平，最後喺加時輸119:128。