【本報訊】王海如是典型背包客，在國際義工服務機構「義遊」工作，足迹遍及逾20個國家。「以前冇諗過同媽咪去旅行，會畀藉口自己，儲多幾年錢先」，直至媽媽確診小腦退化症，身體機能不斷退化，以為仍有時間，其實不然。停薪留職半年帶媽媽出遊，慶幸仍未太遲，「想陪佢睇吓世界！」推着輪椅在京都漫步、踏足在香港卻未去過的長洲。世界很大，只恨時間太少。
記者：呂麗嬋
「媽媽，你嘅夢想係乜？」偶然看到有關夢想計劃的廣告，海如問媽媽。「我希望你做官，快啲嫁人……」慈母的答案還是關於女兒，小妮子哭笑不得，只好解釋：「我係問你有乜想做。」從未出國的媽媽嘆口氣：「我都老喇，又坐輪椅，咪就係等你幾個放假，帶我周圍走吓。」「咁你最想去邊？」「日本！鄉里話風景好靚」。閒話家常，成就兩母女出遊的約定。
「媽媽同我好似，都對世界好奇，佢後生時對香港好奇，今日嘅我對世界好奇」。海如說：「過去幾個月，了解多咗。」2012年理大中文及雙語系畢業，三兄弟姊妹排中間，像大部份年輕人喜歡周遊列國，看不同國家文化，聽不同人的故事，偏偏對父母所知甚少，「我未出世爸爸已過身」。
直至4年前，50歲的媽媽確診患病，她不諱言是轉捩點，「越近嘅地方越會忽略，試過飲完茶同媽媽出中環，我話去離島，先知媽媽嚟咗香港廿幾年，長洲都冇去過」。陪媽媽出入醫院，因而與媽媽獨處，她聽了很多從未聽過的家族故事：關於早逝的爸爸，關於關係疏離的婆婆公公，還有關於媽媽年輕時對繁華香港的憧憬，「唔係因為旅行，都唔會傾到呢啲，好想同佢返一次鄉下汕尾」。
尋根，像是上世紀的詞語。自小家貧的海如，16歲已半工讀在快餐店工作，她直言小時候與媽媽關係疏離，「以前細個唔會諗阿媽獨力照顧我哋幾艱難，只知佢返幾份工好唔得閒」，送外賣、倒垃圾、在地盤做雜工，全是體力勞動工作，「我記得有個農曆年，阿媽一個人要倒成幢樓嘅垃圾，嗰時細佬仲細，我同哥哥要去幫手」。
有遺傳風險 盼活出意義
但海如說，家裏再窮都未試過捱餓，「媽媽好注重我哋學業，學校要買電腦，左湊右湊都一定要買」。她與哥哥相繼考上大學，哥哥畢業後做社工，她在非牟利機構工作。只是，子女陸續出身，疾病卻找上王媽媽，半生勞碌為生活，無緣放眼世界，未及享清福，已被困輪椅，「最初唔知係小腦退化，開始時成日無端端跌親，以為只係太攰」。
由懷疑到確診，路途漫長，海如說，4年間見證能頂半邊天的媽媽，由堅持以傘代枴杖，到後來改用助行架；兩年前終於要坐輪椅代步，手眼亦開始不協調。
「小腦退化影響平衡力，其他身體功能都會慢慢退化」，日劇《一公升的眼淚》正是以此病為題材。由於是遺傳病，她與哥哥及弟弟都有五成患病風險。面對家族宿命，海如說已有心理準備，倒是媽媽比自己更看不開，「佢唔肯接受訪問，係怕你會問起呢個病」。面對未可知的未來，她說：「媽媽50歲發病，我仲有廿幾年，會好好諗點樣過，就算將來行唔到、睇唔到嘢，都唔會後悔。」
放眼世界，讓她擁有不一樣的人生觀。「細細個已問自己，係咪讀好書、搵份政府工然後結婚生仔，就係最好嘅人生？」在她心中，錢重要但不是最重要，「媽媽嘅病，令我覺得過有意義嘅生活更加重要」。人生苦短，小妮子希望能為自己而活，讓所愛的人快樂，「帶媽媽去旅行，係好小嘅夢想，就算冇資助都會去，但原來幾微小都好，只要大聲講出嚟，真係會有人和應你」，獲批「今生不做機械人夢想基金」的海如笑着說。