求驗客手記：
名宿做佈景C朗晒獎再爆「格」

基斯坦奴朗拿度（C朗）新年第一擊，賽前先晒金球獎，之後頂入一球，幫皇家馬德里喺西甲主場以5:0大破CF格蘭納達，亦追平巴塞隆拿39場嘅西班牙球隊最長不敗紀錄。C朗舊年第四度贏得金球獎，噚日趁皇馬主場比賽，搞咗個晒獎儀式，球隊仲邀請咗多位拎過金球獎嘅名宿嚟賀一賀，包括高柏、費高、朗拿度、奧雲同埋教練施丹，真度就將金球獎頒畀C朗，之後C朗就同佢嗰四個金球獎影張大合照。

講番場波，皇馬喺12分鐘由艾斯高開紀錄。20分鐘，莫迪歷遠射，格蘭納達門將奧祖亞甩手，C朗同賓施馬一齊執雞，最後賓施馬快一步射成2:0。27分鐘，C朗頂成3:0。四分鐘後，艾斯高整多球。換邊後，皇馬靠卡斯米路建功，贏到5:0完場，各項賽事連續39場不敗，追平巴塞嘅西班牙球隊不敗紀錄。