北京向民主派釋出善意，向佢哋發還回鄉證，但民主派反應好冷淡，政府之後食住上，再話安排立法會議員到內地考察東江水水質，不過冇乜民主派議員答應肯去睇水，立法會發展事務委員會噚日傾呢個問題，就將白鴿黨議員黃碧雲擺上枱，話最早係黃碧雲建議去睇水，民主派冇理由唔派人去！
立法會發展事務委員會噚日召開特別會議，討論係咪喺下月19至20日到內地考察東江水水質。委員會主席張宇人因為病咗，一開會已經失聲，要由副主席劉業強代主持會議。唔少建制派包括周浩鼎同何俊賢，即時擺黃碧雲上枱，話呢個行程係黃碧雲喺2015年提出，所以反對派應該參加。
慢必：去晒考察驚流會
不過民主派冇因為咁而就範，人民力量議員慢必話，好積極考慮考察，但話20日立會有4個會要開，擔心大批議員去咗考察會流會，又話擔心今次係咪純粹睇水，引述傳聞話京官或會接見議員講其他嘢，如發生呢啲事，中途留低咗佢喺嗰邊點算？公民黨郭家麒就加料，話就要求政府安排化驗師隨團抽驗東江水。
發展局副秘書長麥成章就向民主派大派定心丸，話今次純粹睇水，絕無其他節目，即係唔會見京官，至於話要派本港化驗師隨團抽水化驗，麥成章話之前無提出過，話會再同內地方面溝通咁話。
政府咁順攤，但都似乎未打動到民主派，民主黨尹兆堅同八方講，話去唔去睇水仲要傾，但佢講笑話水嘅嘢一向由黃碧雲睇，民主黨有佢去就得喇！
李八方
mailto:[email protected]