西班牙新一年先安排西盃16強首回合打頭炮，強隊好似皇馬同馬體會等都旗開得勝，好衰唔衰就賴低巴塞隆拿；周四首回合巴塞作客畢爾包，雖然最後階段打多對手兩個，不過都係以1:2輸波，原來教練安歷基執教三年，巴塞新一年首戰都贏唔到波。
巴塞「MSN」組合美斯、尼馬同蘇亞雷斯放完元旦假先歸隊，不過教練安歷基今場都繼續安排佢哋正選，加埋恩尼斯達、碧基等主力齊齊落場，賽前自然瘋狂落飛，巴塞由原來讓半/一打到落一球低水。不過強陣就唔係一定贏，畢包上半場靠阿度里斯同伊拿基威廉斯各建一功，領先2:0，呢場都有爭議場面，尼馬上半場禁區被絆跌，球證冇吹罰12碼，好彩下半場巴塞都拎到作客入球，美斯左路K角位罰球勁射入網，幫球隊喺52分鐘破蛋，但畢包兩位中場魯爾加西亞同伊度拉斯比最後16分鐘先後兩黃一紅被逐，巴塞打多兩個都追唔番，好彩仲有次回合，返魯營贏1:0就夠出線。原來安歷基新一年首戰都例牌慢熱，2015年首戰聯賽輸俾皇蘇，上年巴塞市打吡就悶和愛斯賓奴，今年西盃又輸波，睇嚟佢真係唔好放咁多假期俾班球星好喎。