又多一個喺歐洲大會搵食嘅球星去中超！尼日利亞中場約翰米基爾，周四去咗中超天津泰達做體測，仲笑騎騎攞住件泰達波衫影相，而且仲寫咗封感謝信多謝車路士；29歲嘅米基爾家陣只係等官方宣佈落實就正式轉會，周薪據報達14萬鎊。
由於佢今夏同車仔約滿，消息話泰達唔使畀轉會費，但車仔將奧斯卡杜斯山度士賣畀上海上港就收咗6,000萬鎊，所以應該唔介意。另外，泰達同日亦喺阿積士簽埋塞爾維亞中場尼曼查古迪積，轉會費為510萬鎊。話時話，中超球會狂用銀彈簽歐美球星 ，仲話費倫都應承埋4千萬鎊賣前鋒卡連歷，搞到體育總局亦出聲明，話會計劃抑制球會用天價轉會費簽外援，同埋設置球員薪酬上限，以及要佢哋搞多啲青訓。