兼職旅遊及風景攝影師Li Na Ngan喺美國阿拉斯加，用魚眼鏡頭影到張「綠茶卷蛋」北極光照，獲西班牙組織Spain Buddy選為「2016年度最佳旅遊攝影作品獎」。但原來拍「綠茶卷蛋」嘅背後，係要喺零下氣溫呆等兩個鐘先影到，真係少啲耐力都唔得呀！
Li Na本身係IT女，佢同八方講，因為自己成日出差，去到好多國家影靚相，近年仲養埋狗，想捕捉愛犬嘅動靜，就愛上咗攝影，仲做埋兼職旅遊及風景攝影師。
至於張「綠茶極光」點影到呢？佢話當日本來喺湖邊影日落，心諗如果夜晚喺度影埋極光一定好靚，決定食完dinner再嚟影，初頭等極都冇動靜，仲要喺零下2℃，又凍又攰，有諗過走人或者轉地方，好彩最終冇放棄，等咗兩個鐘，終於等到極光出嚟，啲光仲識轉㖭！Li Na話今次得獎，令佢更加明白「任何事都要堅持，幾凍幾攰都唔可以放棄，相信自己嘅抉擇」。