禮拜日（8日）沙田馬場將會上演十場為八草兩泥賽事，草地採用C跑道。睇番最近11月27日同一移欄八場轉彎路程賽事，除了蔡約翰的「首飾大帝」及姚本輝的「旌暉」擺前建功外，其餘頭馬全部從中後位置衝上贏馬，其中蘇偉賢的「皇帝誥令」及徐雨石的「阿凡達」更加排外檔沿途在外叠望空競跑都照贏，所以靠後勁食糊之中外檔馬不能輕視。
今戰列陣馬中，練馬師容天鵬的「高利多」出賽尾場二班草地1600米，正是於11月27日贏馬，而且兩次跑C欄1600米均非勝即位，以其後勁，再配上公認騎功好的騎師莫艾誠，有力再贏。
另外，練馬師大摩安排第五場四班1800米出戰「醉必勝」，此駒曾在田C欄1800米獲一冠一亞，而且曾在三班贏過馬，今次強配旺人潘頓在四班出爭強項值得睇好。
至於兩場泥地均跑1200米，最近12月4日三場同程，分別有告達理的「彩球」及蘇保羅的「一哥」後上勝出，所以第四場四班的「執子之手」及第九場三班「仁愛之星」此類擅跑泥地之後上馬可優先留意。