政治半日都嫌長，西九故宮極大機會超支滯後甚至爛尾，但發展商已經做好巨大改變下的plan B，由這一刻開始，開行馬力，抽故宮水！豪宅樓盤相繼假愛國真愛錢，個個搵故宮做靠山，例如啟德故宮，土瓜灣．故宮，大埔@故宮，故宮東南北九。將來梁特退下火線重返測量界搵食，也可以搞番幢故宮六八九，迎難而上。這幢故宮六八九，頂樓68與69層相連，每層5個單位，一如既往，欠七。
除了故宮，其他納米樓盤亦食住上，叫做乜乜科技園。比車位還要細的，大膽叫做龍床科技園。明目張膽霸佔官地的鄉黑，也在棕地上搞貨櫃劏房，叫自己做卧薪嘗膽科技園，前面四隻字還掛了西環張小明的墨寶出來晒冷，雖然唔知真假，但鄉紳說，入伙時會邀請肯定夠票當上特首的鄭蛾來開光剪綵，叫租客住住先。龕位持份者也來分杯羹，雞乸大字隻招徠，百無禁忌，就叫做創新喪生科技園大聯盟！園區鄰近深圳河套，貪那邊的濕地特別腍。大聯盟老細寫包單會請梁特一家去奠基，順便幫前第一家庭和新一任老頂，闔家留定位。
這份大禮，滴水不漏，免申報的啊。