如果曾喺中環見到陳婉婷（牛丸）拉住架車、孭住個袋，成個速遞員咁出現（圖），唔使驚訝，呢位亞洲最佳女教練冇轉行，佢只係試工，了解速遞員嘅辛勞。
牛丸話速遞員每日派件負重幾十公斤，好易勞損，但冇保障。佢提醒大家，如果下次喺街上遇見速遞員，不妨讓一讓路，互相體諒。
其實牛丸係應邀參與樂施會「勞力是……#窮得只剩份工」藝術展，策展人謝至德搵埋桌球四眼cue后吳安儀、港大醫學院院長梁卓偉同導演黃修平等，一齊試工大半天，體驗基層工作，作品叫《有名有姓》。好似吳安儀就攞起掃把跟清潔工興姐學倒垃圾，先發現比揸cue仲困難，體會到清潔工喺社會嘅重要性，先係香港之光。
參展有11名藝術家，包括程展緯、梁祖彝及白雙全等，透過裝置、陶瓷等不同藝術形式，呈現基層勞工背後嘅辛酸同不公。樂施會盼藉此加深公眾了解在職貧窮結構性問題，推動政策令工友脫貧，過有尊嚴生活。展覽本月10日起至27日喺石硤尾賽馬會創意藝術中心L1及L0藝廊舉行，設導賞團同研討會等。