又有小店講拜拜。大埔運頭塘商場第一代小店之一「其昌文具」，噚晚正式拉閘關門大吉，告別服務街坊25年嘅日子，街坊萬般不捨，唔少自細幫襯、已經成家立室嘅爸爸媽媽，專登帶埋小朋友嚟舖頭送別羅老闆。
最後一日做生意，舖頭文具玩具都清得七七八八，羅老闆話，近日唔少街坊知道舖頭做唔落去，親手整餅整蛋糕嚟，多到食唔晒，「你話有冇人情味？」羅老闆多年堅持薄利多銷不謀暴利，累積一班忠心客，連只係搬嚟大埔幾個月嘅財經節目主持人陳慧儀，噚日都嚟同老闆講再見。領展賣盤搞到小店陸續消失，陳慧儀話屋邨商場冇晒特色，「行每個商場都一模一樣，你行嚟做咩？」羅老闆希望，可以喺區內搵舖東山再起，但講明唔樂觀，「租金太貴，小店真係好難做，香港人再冇小店喇。」