人民幣日日chok，今日唔知聽日事，人稱「聯滙之父」、景順首席經濟學家祈連活（John Greenwood）噚日主持一年一度投資展望，當然有人要求佢指點吓迷津。點知呢位70歲嘅老行尊聽到就扯火，「你唔好問我隔夜拆息噚晚幾多厘，我唔係專登飛嚟香港答呢啲問題」。
咁人民幣幾時會真正面向世界呢？多年來，唔少賓架估人民幣幾時可以自由兌換，點知年年估，年年唔中，「2015年就估2016年，唔中？再估2017年」，祈連活直頭鬧，靠估真係好蠢（really foolish），因為佢覺得喺可見將來，甚至喺佢老人家有生之年，內地無可能全面開放資本管制，依然會繼續見到在岸、離岸人民幣市場嘅扭曲運作。
祈連活1970年已經入行，先喺日本央行做客席研究員，1983年擔任《亞洲貨幣導報》編輯，提出香港應該採用聯繫滙率、港元掛鈎美元，後來香港政府採用建議，成功穩定港元滙率，亦令祈連活被譽為「聯滙之父」。祈連活現居於倫敦。