原名王家禧的《老夫子》作者王澤日前逝世，幾位由細睇《老夫子》睇到大的香港漫畫家齊齊畫畫致敬，還憶起那些年看老夫子的時光。邱福龍咬牙切齒地說：「因為細個去剪頭髮開始睇，《老夫子》可以好快睇晒，一版就係一個六格漫畫，又好笑。如果你睇《十三點》，你要睇故事，好麻煩，睇到一半剪完，咁點呀？唔通你坐响度睇埋佢呀？唔得嘛！」他提及自己細個一直有追看，也會儲起，「當年呢種漫畫真係唔多，同埋佢真係畫得靚，我記得有個故事係老夫子坐响荒島，有條鯊魚游過，連嗰條鯊魚佢都畫得好靚。」
一版一故事，少點腦力都撐不下去，橋段重複平常過平常。「唔會成本咁多故事都好笑，當然有啲無咁好笑，一定嘅，唔通有一頁無咁好笑就唔鍾意？唔會咁啦！」邱福龍工作忙到甩晒轆，沒時間看了，反而女兒迷上了。「我個女繼承咗，佢學校圖書館有。有星星、符號代表粗口，以前學校可能會禁，不過依家啲學校開放咗。」他認為一部漫畫能歷經兩代，殊不簡單。「佢變咗經典。」
漫畫家甘小文最喜歡王澤筆下的「死飛仔」。他笑說：「嗰啲着喇叭褲、窄身恤衫嘅飛仔係壞人，細個冇反抗能力，曾經被呢啲人蝦，你睇老夫子將佢哋畫到好樣衰，就好似出咗一口氣咁。」他覺得老夫子的身材比例很好，其實不易為。「你叫我畫老夫子，我畫唔到，他藏咗好多嘢响呢個人物入面，身體語言、肢體動作，就好似差利咁，佢又真係畫到晒出來。你睇佢啲筆觸，透視好準確的。」
擅長畫筋肉男的梁偉家，曾經在老夫子50周年時畫過一幅大隻老夫子及大番薯作為賀圖。「我畫港漫，港漫有好多肌肉型的主角，所以特別响老夫子同大番薯後面畫個大隻倒影，將我哋港漫畫家嘅風格同老夫子結合。」
老夫子十年如一日的造型，他就話越睇越鍾意。「唔換衫仲好，換咗反而唔知佢係邊個，有時佢會着西裝，但覺得唔自然。」王家禧老早把事業交給兒子王澤，梁偉家就頗欣賞子承父業的「小王澤」。「佢嘅畫風、老夫子的面相同埋動態，我都比較鍾意。」
近年《老夫子》一書除了漫畫短故事，還加入很多實用知識、小遊戲等，內容豐富。「有得比小朋友猜成語、填顏色等，又有文章等等，雜誌化嘅《老夫子》這個變化很聰明。」
記者：葉青霞
攝影：鄧鴻欣
