有「公職王」外號嘅行會成員陳智思（Bernard）過去喺唔同範疇嘅公職都做過，由可持續發展、保育，到推廣少鹽少糖都撈埋。佢噚日應邀去全球最大嘅學生組織AIESEC主辦嘅青年影響力論壇，大談自己嘅處理「垃圾」嘅經驗。
Bernard做可持續發展委員會主席時着力處理垃圾嘅問題，向政府提交過「都市固體廢物收費報告」，笑言自己做咗呢個位之後好關心垃圾，可謂一個「垃圾佬」。佢話香港堆填區面臨飽和，到𠵱家仲未起到焚化爐，喺邊區起都會有人反對，係因為擔心影響樓價。
笑指大家會贊成
至於擴建3個堆填區，將軍澳、屯門、北區嘅市民反響會仲大，笑言可能要將焚化爐起喺禮賓府附近，相信大家就會贊成，之不過嗰度地方又唔夠大，引起哄堂大笑。
其實佢講一大輪，又將台北、東京等地成功處理固體廢物嘅經驗做對比，無非想講個簡單道理，知易行難，如果你有遠大想法去影響社會，想為問題搵個解決方法，都要先由自己做起，踏出第一步，而唔係得個講字。
李八方
mailto:[email protected]