啱啱先放完聖誕同新年假，踏入2017年話咁快就有上市公司準備好出上年全年業績！「小小超」李澤楷旗下嘅香港電訊（6823）唔使半個月就埋好數，下星期五13號就出全年業績，唔知佢班同事係咪聖誕新年都要加班先有咁快呢？
睇番以前，香港電訊上市以來都係2月先公佈全年業績，今次咁快手，一班員工農曆新年就可以叠埋心水放假了。
同系電盈（008）都快手喎，本月16號就出全年業績。咁大型嘅上市公司通常都去到2、3月先準備好公佈全年業績，電盈系以往早極都要2月，今次效率之高實屬罕見。唔知「小小超」會唔會因為咁，畀員工過番個肥年呢？