呢期嘅鐵膠好鬼忙，南港島綫通車，個個搶住天光試搭；至於巴士迷呢，一樣唔會好得閒，尤其農曆新年前，可能有個熱點要去蒲一蒲，皆因唔少巴士迷已經喺網上討論區講緊，九巴喺雞年破天荒搞年宵檔，據知係售賣最新賀年禮品同經典精品，唔少粉絲心思思，估緊係啲咩？使唔使排隊搶購先？
九巴第一擊年宵檔設喺元朗東頭工業區遊樂場，年廿五起開檔至年卅晚深宵畀大家掃貨。點解係去到元朗開檔？有巴士迷都心水好清，話九巴近年同元朗區好多地區上嘅合作，仲冠名贊助足球隊，揀喺呢區處男開檔都唔出奇喎。
九巴就喺刊物《今日九巴》預告，攤檔屆時會同市民分享九巴嘅創意產物，肯肯定令巴士迷更加心癢癢。唔知cutie九巴仔，到時會唔會幫手睇檔，兼同市民拜個早年呢？