《咖喱牛腩》2017年第一次同大家見面，喺度先祝大家新年快樂。西甲同意甲球員都放完新年假，呢周重開，就同大家講吓被遺忘嘅意甲。睇番積分榜，前列嗰啲大部份都係見慣見熟、細細個就聽過嘅名，係有一隊奇兵突出嘅阿特蘭大。不過，小弟擔心外號「女神」嘅阿特蘭大下半季就會跌番落去，因為各大勁旅都吼實佢哋嘅主力，分分鐘呢個轉會窗就俾人瓜分晒。
阿特蘭大異軍突出，係靠晒班小將爭氣，佢哋隊波平均年齡25.5歲，僅次於AC米蘭，係今屆意甲第二後生嘅球隊。22歲中堅卡達拉係阿特蘭大嘅青訓產品，除咗防守本份做得好，踢咗半季仲攻入三球，擅長喺死球嗰陣上嚟助攻，但意大利傳媒話祖雲達斯已經簽硬佢。同樣係22歲嘅加利亞甸尼踢防中，亦係阿特蘭大自己培訓出嚟，佢嘅踢法有啲似蒙杜利禾，身體對抗唔算好強，攔截唔錯，畀波亦有水準，但據報佢同國際米蘭已經傾掂數。
講到阿特蘭大呢條中路脊骨，點可以唔提科特迪瓦嘅基斯爾。基斯爾前年加盟球會，20歲仔已經企穩正選，小弟會形容佢嘅踢法似耶耶托尼，攻強守弱。有時基斯爾會拍加利亞甸尼踢中場，有時佢就會踢前一格做攻中，支援艾真度高美斯同比達拿。基斯爾今季聯賽射入六球，係陣中嘅首席射手，但據報車路士對佢同踢右翼衞嘅安德列干迪都虎視眈眈。阿特蘭大家陣就好似一隻小綿羊咁，周圍都係諗住劏咗佢嘅獵人，所以話唔定過咗冬季轉會窗，成隊波嘅脊骨就冇晒；呢個都係中型班嘅悲哀。
文：咖喱