啱啱過完聖誕，即將踏入農曆新年，又係政黨、議員準備年宵攤位、落區同市民拜年同寫揮春嘅好時節。新一屆立法會議員，邊位新丁寫得一手好字？唔知民主黨林卓廷係咪大家嗰杯茶？
阿廷日前喺facebook上載幾張由佢揮毫嘅揮春，寫上出入平安、萬事勝意、學業進步，字體相當工整，阿廷話：「苦練顏體，唔想太難睇」，有網民大讚阿廷手字「好似印出來咁靚！」
阿廷同八方講，去年落區寫揮春，唔係太見得人，之後買咗啲字帖回家苦練約兩個月，「（𠵱家）擺得出嚟啲揮春，梗係見得人啦，寫得少嗰啲都係一般。」佢話黨內卧虎藏龍，寫得一手好字嘅人包括羅健熙、黃偉賢等，相信喺維園民主黨年宵攤檔未輪到佢表演。