阿仙奴喺周二英超絕地反擊，作客般尼茅夫一度落後到0:3下，喺最後20分鐘連入三球扳平3:3。阿仙奴執番一分好過冇，但要追上榜首車路士已經難上加難；呢場俾網民揶揄為「般尼茅夫之夜」嘅比賽，兵工廠又係靠近排fit爆嘅「銀河唯一」基奧特救駕，貢獻兩次助攻同埋喺補時階段入波扳平。
連追三球媲美歐聯經典
99年曼聯喺魯營完場前連入兩球反勝拜仁慕尼黑、05年利物浦喺伊斯坦堡半場落後AC米蘭三球最後都贏到；加埋車路士12年喺拜仁慕尼黑地頭封王，有網民將阿仙奴喺周二呢場英超，同嗰三場歐聯決賽經典大戰拉埋嚟講，笑阿仙奴終於有屬於佢哋嘅「般尼茅夫之夜」。不過講真，用三場歐聯決賽同一場英超相提並論其實唔公平，加上阿仙奴啱啱喺元旦日贏完水晶宮之後48個鐘就要對般尼茅夫，球員體力打咗折扣，都可以喺落後三球下扳平，絕對唔係易事。
般茅喺58分鐘由賴恩費沙射成3:0，當時睇怕大局已定，但阿仙奴喺70分鐘開始大反擊，基奧特頭槌二傳畀「山神」阿歷斯山齊士頂入；五分鐘後基奧特再做二傳，交畀盧卡斯佩雷斯，後者窄位射入世界波，亦係佢喺兵工廠第一個英超入波。到92分鐘，基奧特喺禁區頭槌攻門得手扳平3:3，連續三場英超貢獻關鍵入波（見附表），再做英雄。基奧特雖然今次唔係蠍子射門入波，但佢慶祝嗰陣都特登整個蠍子尾姿勢畀球迷睇吓；但傳有離心嘅山神就開心唔落，吹完場雞後將對手套逐一怒掟落地，對失咗兩分好唔滿意
雲格暗寸賽會偏袒車仔
領隊雲格賽後都話可以攞到一分都好難得：「賽前我哋已經有三、四位球員有傷，要到臨開波先知踢唔踢到，比利連就係喺今場紮住上陣。相距48個鐘就要再比賽真係好難搞，不過我哋冇得投訴，只可以收聲，自己諗計拆掂佢。」雲格亦炮轟英超賽會搵錢至上，為咗配合電視直播，令到某啲球隊因而佔優，可能暗示嘅係遲佢哋一日先比賽嘅車路士：「今年係我喺英超20年嚟賽程最唔平均嘅聖誕新年賽期。」不過，如果雲格到下季仲繼續喺兵工廠撈，隨時仲難捱，有報道話到17/18球季，為咗遷就出年上演嘅世盃決賽周，英超賽程要進一步壓縮，聖誕新年快車更加難捱，最壞情況係可能會有球隊要喺17日內踢六場波，真係鐵人都冇命。