國際排聯（FIVB）周二宣佈，喺今夏帶領中國女排贏得里約奧運冠軍，兼獲准加盟土超勁旅華基夫銀行嘅朱婷，當選國際體育新聞協會（AIPS）嘅年度傑出運動員。
2016年對於中國女排嘅朱婷嚟講，肯定係一個豐收年，呢位22歲主攻手喺里約奧運幫中國女排重奪失落12年嘅金牌之餘，更同時榮膺最有價值球員（MVP）。朱婷喺里奧後加盟土超勁旅華基夫銀行，仲幫隊波喺世界冠軍球會女排錦標賽贏得季軍，兼入選最佳陣容，可以話係呢一年最搶鏡嘅女排選手。朱婷近日接受網站World of Volleyball嘅訪問時，就透露自己希望可以留喺土耳其打多四年，而佢嘅目標係要幫華基夫銀行喺歐冠同土超贏冠軍。
除咗朱婷之外，仲有六位排球選手入圍AIPS嘅傑出運動員名單，當中包括喺里奧幫塞爾維亞贏得銀牌嘅奧珍諾域，呢位32歲嘅二傳手仲帶領伊薩奇巴希喺世冠女排錦標賽奪冠。至於波多黎各女排嘅主攻手古絲，就憑住首次帶領國家隊喺奧運亮相而入圍。