各位反曼迷，我求大俠幫你哋搵咗樣有利數據，嚟緊可以抽吓曼聯水，話佢哋踢粗野足球。原來紅魔今季成日犯規，現排英超茅王榜第二位，犯規次數只係少過屈福特。
計埋禮拜二嘅英超賽果，曼聯今季場均犯規13次，係犯規第二多嘅球隊，至於屈福特就以14.4次位居英超茅王之首！排第三位嘅熱刺，每場平均犯規12.9次。講到最「乾淨」嘅球隊，真係估你唔到，史篤城同侯城同樣以場均10次犯規並列。喺我求大俠睇波嘅印象中，史篤城以前係踢法粗野嘅代表，但家陣竟然變咗君子球隊。黃牌數量上，同犯規次數都有關係，因為排頭兩位嘅分別就係屈仔同曼聯，但紅牌方面排第一嘅竟然係曼城，佢哋今季聯賽已經拎過四張紅牌，阿古路同洛尼圖各拎一面，而費蘭甸奴就拎咗兩面。
