元旦日放假，出街又人多車多，結果夜晚留喺屋企睇電台音樂頒獎禮；呢個頒獎禮除咗標榜多人喊，同埋例必要論盡本地樂壇辛酸史外，亦標榜四個「最喜愛」獎都係由觀眾投票產生。正如任何民主選舉制度都會產生令部份人不滿嘅結果，我最喜愛男、女歌手分別由「百姓坤」同「女神宜」獲得，特別係女神宜，好多人批評佢係星二代，成晚消費亡母。不過坦白講，女神宜大大話話都有幾年歌手生涯，之前拎過咩大獎？如果拎到咁重要嘅獎都唔多謝阿媽，又會俾人話不孝箒！繼續彈佢又肥又醜？喂，佢首歌咪講咗審美觀唔係得靚、瘦呢兩個標準囉。
意大利足協日前公佈16年各大獎項，祖雲達斯門將保方成為意大利足球先生，係呢位門神繼13年後再度獲獎。呢次選舉係由各大傳媒推舉五位候選人，再由球迷上意國足協官網投票， 喺參與嘅大約15,000位球迷之中，大多數都投畀保方；以佢喺歐國盃嘅表現，加上幫祖記衞冕聯賽，夠晒實至名歸啦。喂，保方未必係星二代，但佢都係運動二代──阿媽係鐵餅運動員，阿爸係舉重選手，兩個家姐係國家隊排球代表，保方玩運動都係贏在起跑線喎！13歲先加盟帕爾馬青年軍，17歲已經幾級跳，喺意甲「地標」出場對當時班霸AC米蘭，係咪帕爾馬青年軍教練當年受過保方老竇恩惠，要報恩呀？
保方經過咁多年打拼，已經可以話係意大利最出色門將，大家亦唔太理會出身；正如元旦拎獎唔係終結，女神宜應該繼續努力，改變其他人對佢嘅固有觀點。
文：牽牛