皇家馬德里噚日出戰歇冬後首場比賽，喺西盃對西維爾。因為西盃重要性較低，所以球會就唔使基斯坦奴朗拿度（C朗）踢，畀多幾日假佢，等佢唞足精神喺西甲搏殺。C朗周一就返咗去葡萄牙嘅家鄉馬德拉島，仲借機宣傳吓佢喺當地間CR7酒店。佢落機之後冇返屋企，而係同埋女友佐真娜（Georgina Rodriguez）一齊去酒店度住。C朗戴住黑超，着住牛仔褸，型到震！佢亦好有風度咁負責拉篋，等女友凈係拎個手袋。酒店外唔少遊客同街坊都爭住搵C朗合照，C朗睇嚟心情幾好，來者不拒。C朗間酒店暫時有兩間分店，分別喺馬德拉島同里斯查，佢諗住喺紐約同馬德里再開，睇嚟第日掛靴後可以做酒店大亨。不過，C朗阿媽就要破財嘞，因為佢搵阿仔嗰陣違例泊車，有交通警罰咗佢張「牛肉乾」。