剛於周二（3日）34歲生日的壽星公潘頓，於這晚谷草第四場四班一哩，策沈集成馬房「領航大師」報捷，單Win及組合獨贏A2分別派101及35元。
「領航大師」馬主胡偉林出名同娛圈中人熟稔，這晚贏馬後便有佘詩曼、周家蔚、劉浩龍、吳國敬等一齊拉頭馬，場面熱熱鬧鬧。而潘頓連同第三場勝出大摩的「勝一籌」，就此憑呢對5檔賽駒包辦第三口孖寶。
潘頓呢次騎番「領航大師」，事前做足工夫，包括於晨課落足心機操馬，又同練馬師沈集成狂咬耳仔，擺明車馬搏殺。結果「領航大師」跑落真係有啲大師風範，早段居中，中段於外叠提早發力上前，直路再加速爆一段即輕勝近三馬位，贏馬姿態相當輕鬆。此駒累積三勝皆由潘頓在谷草錄得，人馬合作改寫至四戰三冠一季佳績，堪稱最佳拍檔。
今場開冷頭熱腳，二至四名分別為半冷門「勁勇威龍」、大熱門「主力艦」及落飛次熱「盈豐駿駒」，四重彩派4,319元。
除了第三場「勝一籌」、第四場「領航大師」兩匹5檔頭馬外，連同頭場頭馬「金武士」及第二場跑第三的「英姿茂盛」，這晚上半場5檔馬全上名共取三冠一季，演出準到你唔信！