LEGO喺雞年繼續發揮無限創意，炮製全港首隻「智能說話」樂高賀年雞巡遊，同小朋友鬥智，噚晚殺入九龍塘一間芭蕾舞學院挑機。
呢隻LEGO雞用咗19,700塊積木砌成，明顯係一隻大肥雞，更奇係仲識講人話。但成班小朋友見到肥雞冇被嚇怕，反客為主圍住佢起哄，幾乎拆咗佢嘅紅雞頭，扯甩佢條脷咁滯。
LEGO雞仲考班小魔怪IQ，題目同新年有關喎，問佢哋識唔識梁振英、曾俊華、林鄭月娥、葉劉淑儀？個個高呼話識；咁應該學邊個最好？個個一齊回答曾俊華噃。但LEGO雞話答案係葉劉，咁重口味？原來係因為「學業（葉）進步」喎。好爛！
LEGO雞周六起一連9日巡遊全港，同大人細路一齊玩，指定時限內拼砌出樂高迷你賀年雞，就會獲得樂高迷你賀年雞禮物包嘞！