每逢港鐵有新路綫啟用，好多鐵路迷都會湧去新車站「打卡」，但有個隱藏車站佢哋就冇乜機會去，難怪一眾立法會保安事務委員會委員，都忍唔住攞電話出嚟影靚相。個站喺邊？將軍澳百勝角囉！
百勝角站幾可亂真
噚日委員會14個委員參觀百勝角消防及救護學院，視察內部訓練情況同示範，除咗消防車輛駕駛操作、鐵路救援、拯救車禍傷者、坍塌搜救，仲參觀埋訓練消防員處理車站火警用嘅「百勝角站」，有月台幕門有列車模型，牆身仲有「地鐵宋」字體嘅百勝角站名，幾可亂真，公專聯莫乃光、民主黨涂謹申、新民黨容海恩同其他委員，都興奮地selfie留念。
新民黨田北辰更加係機不離手，由一開始睇駕駛訓練、油站火警示範已經開機自拍，到消防員示範撲救「回燃」現象、試用熱能探測器時，佢仲拉埋黨友容海恩擺pose影相，成班議員好似冬季大旅行咁開心。委員會副主席涂謹申話，希望消防處繼續留意有乜新科技，用合理價錢買番嚟，等消防員有最大保障；長毛梁國雄就話，四大紀律部隊一樣咁辛苦，希望嚟緊財政預算案有啲表示，解決同工不同酬嘅情況，紓緩前線人手壓力。
李八方
mailto:[email protected]