快活谷馬場這晚新一年首次跑馬，一開場第一場五班1200米，即有人快樂有人愁，騎、練杜利萊同方嘉柏合作以「金武士」殺敗文家良馬房「盈喜悅」，攜手打響新一年谷戰頭炮，兼雙雙於新一年首嘗勝果，反觀連日枕住有馬退役及離巢的文家良則功敗垂成，2017年仲未有頭馬落袋！
「金武士」今場沿途居中，直路取外疊一湧而上贏頸位，馬主林景培三父子在澳門亦有養馬，「金武士」季初由雷神贏田草五班1200米開齋，之後一直於四班落敗，上仗更在谷草1650米包尾，今次重返五班兼大幅縮程即有料到，由新配搭杜利萊爆出9.2倍半冷Win，組合獨贏A3派25.5元。
杜利萊同時係頭糊專家，須知佢對上兩次贏馬，分別是於谷草夜賽頭場及田草日賽頭場勝出「荷蘭風車」（12月7日）及「精益旅程」（12月27日）；呢場「金武士」亦見證杜利萊季內首度為方嘉柏建功。
方嘉柏表示「金武士」上場走三四叠蝕位甚多，輸得非常不值，今仗落五班有利，牠的性能不限於快活谷，沙田也可應付，其中沙田千四米是合適路程，下仗升上四班仍然充滿競爭力。
頭場二至四名順序為「盈喜悅」、「至尊駿爵」及「神寶金剛」，四重彩派九萬三千幾。當中「盈喜悅」季內七戰兩亞兩殿，尚未敲響轉文家良馬房後勝鼓。