叉完電又會充滿力量作戰嘞，白鴿黨港島區立法會議員許智峯都係咁話。佢喺聖誕期間一家大細去咗澳洲玩咗9日，去咗4、5個海灘，喺日光浴下過聖誕。原來佢家姐嫁咗去澳洲，所以每隔一、兩年，佢都會去澳洲探親。湊住一仔一女嘅佢話雖然論盡啲，但唔算好辛苦，因為仔女開始大，唔似得以前咁多扭計，佢最記得兩年前抱阿仔去澳洲，嗰九個鐘頭機佢全程喊，都幾濕滯。
許智峯元旦前夕返港參加元旦遊行聲援被政府DQ嘅議員，之後就有連場硬仗，佢話明會為TSA長期作戰，表明政府若決定繼續考，「好有決心，一定會同佢死過」，透露屆時會同學校舉行一系列抗爭行動，而爭取保留加多近街臨時花園，都係未來嘅主打議題。