「大美人」關之琳乃娛樂圈中富婆，投資物業向來有斬獲。佢透過公司名義六年前以1.39億元，買入壽臣山道東1號一幢雙號屋，喺市場放售咗一段時間，索價徘徊2億元，一直冇乜聲氣，直至上月，洋房終於以1.43億元低調沽出，賬面賺400萬元。
土地註冊處資料顯示，新買家為林裕豊（Liem Reyner），以洋房實用面積2,657方呎計，成交呎價達5.38萬元。呢間屋之前出租，計入租金收入，今次沽出扣埋稅，關之琳應該都有賺400萬。
關之琳原名關家慧（Rosamund Kwan Ka Wai），多年來投資過唔少豪宅、舖位，兩年前，佢透過賣殼形式，以2.45億元沽出南灣道16號A屋，持貨七年大賺1.3億元，同年再以2,688萬元沽出灣仔星域軒，又賺690萬元，好勁㗎。