時下打工仔，一份工做超過十年，買少見少，反而舊陣時，好多人為一間公司打一世工，直到退休。
好似加入大昌行（1828）25年嘅行政總裁（CEO）葉滿堂，噚日宣佈將於3月退任，由華潤啤酒（291）過檔大昌行剛好半年嘅副行政總裁黎汝雄接任。
65歲嘅葉滿堂加入大昌行之前，曾經喺機電工程署工作16年，1992年加入大昌行，2007年升做CEO。佢喺任內除咗幫公司開拓汽車租賃、中國融資租賃等業務之外，舊年亦收購利豐（494）內地消費品分銷業務。
至於接任嘅黎汝雄，佢舊年6月先加入大昌行，唔知係咪因為對集團管理未到好熟書，所以葉滿堂退任之後，直到6月底前會繼續留喺公司幫手，同新管理層處理交接工作。