南港島綫通車，區內居民不知幾咁興奮，始終喺巴士外多咗個出港島嘅選擇，所以試搭者眾，就連海怡居民香港眾志黃之鋒，都試過去搶搭頭班車，可見係區內盛事！
公民黨前港島立法會議員陳家洛近日都有落區，了解街坊對南港島綫嘅意見，原來有日佢喺海怡半島站「視察」期間，仲巧遇港鐵車務營運主管李聖基（圖），咁總舵主就同呢位港鐵「吉祥物」一齊「巡視業務」嘞！
公民黨近日特別為此搞咗個網上問卷調查（ https://www.surveymonkey.com/r/sh1228 ），歡迎海怡街坊分享意見，例如問吓喺海怡站有冇因為人多擠迫而要等下一班車等；1月8日晚仲會喺海怡社區中心大堂搞居民大會，總舵主話呀，歡迎鐵膠、巴膠到場講交通，咁海怡鐵膠黃之鋒一定要捧場啦。